16 Հունիսի 2006, 892 - Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2005 ԹՎԱԿԱՆԻ ՀՈՒՆԻՍԻ 9-Ի N 947-Ն ՈՐՈՇՄԱՆ ՄԵՋ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ
Հայաստանի Հանրապետության կառավարությունը ո ր ո շ ու մ է.
1. Հայաստանի Հանրապետության կառավարության 2005 թվականի հունիսի 9-ի «Անհատույց պետական ֆինանսական աջակցություն տրամադրելու մասին» N 947-Ն որոշման մեջ կատարել հետևյալ լրացումները`
որոշմամբ հաստատված կարգի`
ա) 3-րդ կետը «վթարային» բառից առաջ լրացնել «4-րդ աստիճանի», իսկ «բնակմակերես» բառից հետո` «ինչպես նաև այն ընտանիքները, որոնց անդամներից մեկը տառապում է հետևյալ հիվանդություններից մեկով` բոլոր օրգանների և համակարգերի տուբերկուլոզի ակտիվ ձևերը` տուբերկուլոզային ցուպիկների արտադրությամբ, մտագարություն, մոլագար դեպրեսիվ պսիխոզ, ընկնավորություն, պրեսենիլային և սենիլային պսիխոզներ, կենտրոնական ներվային համակարգի օրգանական ախտահարումները` վերջույթների ֆունկցիայի և կոնքի օրգանների ֆունկցիայի կայուն ծանր խախտումներով (կրած գանգուղեղային ծանր վնասվածքների հետևանքները, տարածուն սկլերոզ, կողային ամիոտրոֆիկ սկլերոզ, սիոինգոմելիա, ուղեղային կաթված), բրոնխային ասթմայի ծանր ձևը` հաճախակի նոպաներով, 2-րդ և 3-րդ աստիճանների բարդացած շնչառական անբավարարությամբ, եթե հիվանդին առանձին սենյակ կամ լրացուցիչ բնակմակերես հատկացվելու դեպքում ընտանիքի յուրաքանչյուր անդամին կմնա 5 և 5-ից պակաս քառակուսի մետր բնակելի մակերես» բառերով.
բ) 4-րդ կետի երրորդ պարբերությունը «տարածքային ստորաբաժանման» բառերից հետո լրացնել «և տեղեկատվական կենտրոնի» բառերով.
գ) 5-րդ կետն առաջին նախադասությունից հետո լրացնել հետևյալ նախադասություններով.
«Համայնքի ղեկավարը բնակարանային պայմանների բարելավման հաշվառման է ընդունում այն ընտանիքներին, որոնք մշտապես բնակվում են տվյալ բնակավայրում, ընդ որում, Երևան քաղաքում` առնվազն վերջին 10 տարին, իսկ Երևան քաղաքի վարչական սահմաններից դուրս գտնվող բնակավայրերում` առնվազն վերջին 5 տարին: Բնակության ժամանակը որոշվում է տվյալ բնակավայրում հաշվառման առկայությամբ:
Այն քաղաքացիները, որոնք բնակարանային պայմաններն արհեստականորեն վատթարացրել են փոխանակելու, օտարելու միջոցով, կարող են բնակարանային պայմանների բարելավման հաշվառման ընդունվել իրենց բնակարանային պայմանները վատթարացնելու օրվանից 5 տարի անցնելուց հետո: Նշված կանոնը չի կիրառվում դատարանի օրինական ուժի մեջ մտած վճռի հիման վրա բնակտարածության օգտագործման իրավունքը կորցրած ճանաչվելու և բնակարանը (բնակելի տունը) հրապարակային սակարկություններով վաճառելու միջոցով վատթարացման դեպքերում».
դ) 9-րդ կետը լրացնել հետևյալ նախադասությամբ.
«Աջակցությունն ընտանիքին տրամադրվում է միայն մեկ անգամ»:
2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
