8 Հունիսի 2006, 789 - Ն
«ԼՈՒՍԱՆՇԱՆ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆ ՍՏԵՂԾԵԼՈՒ ՄԱՍԻՆ
«Պետական ոչ առևտրային կազմակերպությունների մասին» Հայաստանի Հանրապետության օրենքի 9-րդ հոդվածին համապատասխան` Հայաստանի Հանրապետության կառավարությունը ո ր ո շ ու մ է.
1. Հիմնադրման միջոցով ստեղծել «Լուսանշան» պետական ոչ առևտրային կազմակերպություն:
2. Սահմանել, որ «Լուսանշան» պետական ոչ առևտրային կազմակերպության գործունեության հիմնական առարկան և նպատակներն են`
ա) անվտանգ երթևեկության կարգավորման տեխնիկական միջոցների ներդրումը,
բ) անվտանգ երթևեկության կարգավորման տեխնիկական միջոցների շահագործումը և կատարելագործումը,
գ) անվտանգության նշագծումների իրականացումը:
3. Թույլատրել «Լուսանշան» պետական ոչ առևտրային կազմակերպությանն իրականացնել ձեռնարկատիրական գործունեության հետևյալ տեսակները`
ա) անվտանգ երթևեկության կարգավորման տեխնիկական միջոցների արտադրություն (ճանապարհային նշաններ, լուսանշաններ, ղեկավարման էլեկտրոնային սարքեր և այլն),
բ) շինարարական աշխատանքների իրականացում (բացառությամբ կապիտալ շինարարության),
գ) անվտանգ երթևեկության կարգավորման տեխնիկական միջոցների ներդրում և անվտանգության նշագծումների իրականացում,
դ) գիտատեխնիկական աշխատանքների, արտադրության մեջ գիտության նվաճումների և առաջավոր փորձի ներդրում:
4. «Լուսանշան» պետական ոչ առևտրային կազմակերպության կառավարման, ինչպես նաև «Պետական ոչ առևտրային կազմակերպությունների մասին» Հայաստանի Հանրապետության օրենքի 13-րդ հոդվածի 2-րդ մասի «դ» «ե» և «է» ենթակետերով և 14-րդ հոդվածով նախատեսված լիազորությունները վերապահել Հայաստանի Հանրապետության կառավարությանն առընթեր Հայաստանի Հանրապետության ոստիկանությանը:
5. Հայաստանի Հանրապետության օրենսդրությամբ սահմանված կարգով Հայաստանի Հանրապետության կառավարությանն առընթեր Հայաստանի Հանրապետության ոստիկանության գույքի կազմից առանձնացնել 58.111.629 դրամ արժողությամբ գույք և այն անժամկետ և անհատույց օգտագործման իրավունքով ամրացնել «Լուսանշան» պետական ոչ առևտրային կազմակերպությանը` համաձայն հավելվածի:
6. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
