18 Հունիսի 2020, 1123 - Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2019 ԹՎԱԿԱՆԻ ՆՈՅԵՄԲԵՐԻ 21-Ի N 1667-Ն ՈՐՈՇՄԱՆ ՄԵՋ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ
Հիմք ընդունելով «Նորմատիվ իրավական ակտերի մասին» օրենքի 33-րդ հոդվածի 3-րդ մասը՝ Հայաստանի Հանրապետության կառավարությունը ո ր ո շ ու մ է.
1. Հայաստանի Հանրապետության կառավարության 2019 թվականի նոյեմբերի 21-ի «Սևանա լճում ձկան և խեցգետնի պաշարների վերականգնման, պահպանման, վերարտադրման, ինչպես նաև դրանց պաշարների որոշման, ձկան և խեցգետնի արդյունագործական որսի քանակների, ձևերի և կազմակերպման կարգը սահմանելու մասին» N 1667-Ն որոշման մեջ կատարել հետևյալ լրացումները և փոփոխությունը՝
1) որոշման N 1 հավելվածի 3-րդ կետի 2-րդ ենթակետը «որսամիջոցների նկարագիրը» բառերից հետո լրացնել «և որսի նպատակով օգտագործվող լողամիջոցների մուտքի և ելքի տեղամասերը» բառերով.
2) որոշման N 3 հավելվածում`
ա. 4-րդ կետի 1-ին ենթակետը «ստեղծում» բառից հետո լրացնել «՝ համաձայն համապատասխան տարվա տարեկան ծրագրով հաստատված տեղամասերի ցանկի։» բառերով,
բ. հավելվածը լրացնել հետևյալ բովանդակությամբ նոր՝ 7.1-ին և 7.2-րդ կետերով.
«7.1. Հայտերը ներկայացվում են յուրաքանչյուր տարի սույն կարգի 5-րդ կետով սահմանված կայքէջում համապատասխան հայտարարությունը տեղադրելու օրվանից 30 օրվա ընթացքում (բացառությամբ 2020 թվականի, որի դեպքում հայտերը ներկայացվում են սույն կարգի 5-րդ կետով սահմանված կայքէջում համապատասխան հայտարարությունը տեղադրելու օրվանից 10 աշխատանքային օրվա ընթացքում):
7.2. Հայտերի ընդունումից հետո լիազոր մարմինը տարեկան ծրագրով ձկան և խեցգետնի օգտագործման առավելագույն չափաքանակը բաշխում է ներկայացված և սույն կարգով սահմանված պահանջները բավարարող հայտերի քանակի վրա և ստանում միջինացված ցուցանիշ։ Հայտատուի կողմից հայտում ներկայացված չափաքանակն ապահովելու նպատակով լիազոր մարմինը՝
1) միջին ցուցանիշից ցածր չափաքանակով հայտերը բավարարում է ամբողջությամբ.
2) միջին ցուցանիշից բարձր չափաքանակով հայտերը բավարարում է միջին ցուցանիշից ցածր չափաքանակով հայտերը բավարարելուց հետո մնացած չափաքանակի հավասարաչափ բաշխմամբ:»,
գ. 8-րդ կետում «հայտն ստանալուց հետո» բառերը փոխարինել «հայտերը ներկայացնելու համար սահմանված ժամկետի ավարտից հետո`» բառերով։
2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։
