Հայաստանի Հանրապետության էլեկտրոնային կառավարում | e-gov

Ղեկավարվելով «Հանրության գերակա շահերի ապահովման նպատակով սեփականության օտարման մասին» Հայաստանի Հանրապետության օրենքի 7-րդ հոդվածի պահանջներով և Հյուսիս-հարավ ճանապարհային միջանցքի ներդրումային ծրագիր-ծրագիր 2-ի շրջանակներում Մ1 Երևան-Գյումրի-Վրաստանի սահման միջպետական նշանակության ընդհանուր օգտագործման պետական ավտոմոբիլային ճանապարհի Աշտարակ-Թալին կմ37+544.68-կմ40+000 և կմ47+400-կմ71+500 հատվածի վերակառուցման, տվյալ հատվածի օտարման գոտու սահմաններում գտնվող ոռոգման, ջրամատակարարման, գազամատակարարման և էլեկտրամատակարարման համակարգերի տեղափոխման (այսուհետ՝ ծրագիր) նպատակով Հայաստանի Հանրապետության կառավարությունը որոշում է.
1. Ծրագրի իրականացման համար սույն որոշման N 1 հավելվածում նշված տարածքների՝ սույն որոշման N 2 հավելվածում նշված օտարվող մասերի (այսուհետ՝ օտարվող սեփականություն) նկատմամբ ճանաչել հանրության գերակա շահ` հետևյալ հիմնավորումներով`
1) ծրագրի իրականացման շահը գերակայում է oտարվող սեփականության սեփականատերերի շահերի նկատմամբ, քանի որ ծրագրի իրականացումը նպատակաուղղված է Հայաստանի Հանրապետության միջազգային պայմանագրով ստանձնած պարտավորությունների կատարման ապահովմանը, մասնավորապես, ճանապարհաշինական ծրագրի իրականացմանը, ինչպես նաև ծրագրի արդյունքում ազդակիր համայնքներում անխափան ոռոգման, ջրամատակարարման, գազամատակարարման և էլեկտրամատակարարման ապահովմանը.
2) ծրագրի իրականացման շահը գերակայում է oտարվող սեփականության սեփականատերերի շահերի նկատմամբ, քանի որ ծրագրի իրականացման արդյունքում կստեղծվեն արդյունավետ ենթատարածաշրջանային տարանցիկ ճանապարհներ, կմեծանա առևտրի շրջանառությունն ու մրցակցությունը, կնվազեն փոխադրումների ծախսերը, կմեծանա շուկաների, աշխատատեղերի և սոցիալական ծառայությունների հասանելիությունը, կզարգանա ենթատարածաշրջանային ու պետական տրանսպորտային ցանցը, ինչպես նաև ազդակիր համայնքներում կտեղադրվեն հաղորդակցուղիների նոր համակարգեր.
3) ծրագրի արդյունավետ իրականացումը չի կարող ապահովվել առանց սույն որոշման N 2 հավելվածում նշված տարածքների օտարման, քանի որ վերջիններս գտնվում են ծրագրի շրջանակներում կառուցվող ճանապարհահատվածի օտարման գոտու սահմաններում գտնվող տեղափոխման ենթակա ոռոգման, ջրամատակարարման, գազամատակարարման և էլեկտրամատակարարման համակարգերի՝ սույն որոշման N 2 հավելվածում նշված օտարման գոտու սահմաններում, և անհնար է ապահովել հաղորդակցուղիների վերատեղադրումը՝ առանց տվյալ տարածքների օտարման.
4) օտարվող սեփականության նկատմամբ ճանաչված հանրային գերակա շահը չհիմնավորված վնաս չի պատճառում սույն որոշման N 2 հավելվածում նշված տարածքների սեփականատերերին:
2. Հաստատել`
1) հանրության գերակա շահ ճանաչված տարածքների ցանկը՝ համաձայն N 1 հավելվածի.
2) հանրության գերակա շահ ճանաչված տարածքների օտարման գոտին՝ համաձայն N 2 հավելվածի:
3. Սահմանել, որ`
1) սեփականության ձեռք բերող է հանդիսանում Հայաստանի Հանրապետությունը, որի անունից հանդես է գալիս Հայաստանի Հանրապետության տարածքային կառավարման և ենթակառուցվածքների նախարարությունը.
2) սեփականության օտարման գործընթացն սկսելու վերջնաժամկետն է 2020 թվականի դեկտեմբերի 25-ը.
3) սեփականության օտարման գործառույթների իրականացումը համակարգող պետական լիազոր մարմինը Հայաստանի Հանրապետության տարածքային կառավարման և ենթակառուցվածքների նախարարությունն է.
4) սեփականության օտարման գործընթացն իրականացվում է «Հանրության գերակա շահերի ապահովման նպատակով սեփականության օտարման մասին», «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» Հայաստանի Հանրապետության օրենքների, Հայաստանի Հանրապետության կառավարության 2002 թվականի ապրիլի 20-ի N 438 և Հայաստանի Հանրապետության կառավարության 2010 թվականի սեպտեմբերի 16-ի N 1274-Ն որոշումների պահանջներին համապատասխան.
5) սեփականության նկարագրության արձանագրության կազմման աշխատանքներն իրականացվում են Հայաստանի Հանրապետության կառավարության 2010 թվականի սեպտեմբերի 16-ի N 1275-Ն որոշմամբ սահմանված կարգով և որոշմամբ սահմանված նկարագրության արձանագրության օրինակելի ձևով:
4. Հայաստանի Հանրապետության տարածքային կառավարման և ենթակառուցվածքների նախարարին`
1) մինչև սույն որոշման 3-րդ կետի 2-րդ ենթակետում սահմանված ժամկետի ավարտը՝ օտարման գոտում գտնվող ազդակիր գույքի մանրամասն հետազոտման, մարդահամարի ու սոցիալ-տնտեսական հետազոտությունների, անշարժ գույքի չափագրման և գնահատման արդյունքների հիման վրա մշակել համապատասխան ծրագիր և ներկայացնել Ասիական զարգացման բանկի և Հայաստանի Հանրապետության կառավարության հաստատմանը․
2) սույն որոշումն ուժի մեջ մտնելու օրվան հաջորդող 7 օրվա ընթացքում սույն որոշումը պատշաճ ձևով ուղարկել օտարվող սեփականության սեփականատերերին և օտարվող սեփականության նկատմամբ պետական գրանցում ունեցող գույքային իրավունքներ ունեցող անձանց:
5. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
Հավելված