26 Հունվարի 2006, 76 - Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԱՇՏՊԱՆՈՒԹՅԱՆ ԺԱՄԱՆԱԿ ԿԱՄ ԾԱՌԱՅՈՂԱԿԱՆ ՊԱՐՏԱԿԱՆՈՒԹՅՈՒՆՆԵՐԸ ԿԱՏԱՐԵԼԻՍ ՎԻՐԱՎՈՐՎԱԾ, ԱՆՀԱՅՏ ԿՈՐԱԾ, ԳԵՐԻ ԸՆԿԱԾ ՓՐԿԱՐԱՐԱԿԱՆ ԾԱՌԱՅՈՒԹՅԱՆ ԿԱԴՐԵՐԻ ՌԵԶԵՐՎՈՒՄ ԳՏՆՎՈՂ ՓՐԿԱՐԱՐԱԿԱՆ ԾԱՌԱՅՈՂՆԵՐԻ ԴՐԱՄԱԿԱՆ ԲԱՎԱՐԱՐՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ
«Հայաստանի փրկարար ծառայության մասին» Հայաստանի Հանրապետության օրենքի 64-րդ հոդվածի 4-րդ մասին համապատասխան` Հայաստանի Հանրապետության կառավարությունը ո ր ո շ ու մ է.
1. Սահմանել, որ փրկարարական ծառայության կադրերի ռեզերվում գրանցվում են Հայաստանի Հանրապետության պաշտպանության ժամանակ կամ ծառայողական պարտականությունները կատարելիս անհայտ կորած, գերի ընկած, ինչպես նաև վիրավորված (մինչև բուժման ավարտը) փրկարարական ծառայողները (այսուհետ` փրկարարական ծառայողներ)` ոչ ավելի, քան 3 տարի ժամկետով:
2. Փրկարարական ծառայության կադրերի ռեզերվում գտնվելու ժամանակ` մինչև կարգավիճակի հստակեցումը պահպանվում է փրկարարական ծառայողի ամսական դրամական բավարարման չափը:
3. Փրկարարական ծառայողների դրամական բավարարումն ստանալու իրավունք ունեն փրկարարական ծառայողի (ժառանգատուի) երեխաները, ամուսինը, ամուսին չունենալու դեպքում` ծնողները, իսկ նրանց բացակայության դեպքում՝ ըստ ներկայացման իրավունքի:
4. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
