13 Օգոստոսի 2015, 945 - Ա
ՎԵՐԱՆՈՐՈԳՄԱՆ ԱՇԽԱՏԱՆՔՆԵՐԻ ԱՐԴՅՈՒՆՔՆ ԱՆՀԱՏՈՒՅՑ ԸՆԴՈՒՆԵԼՈՒ ԵՎ ՊԱՅՄԱՆԱԳԻՐ ԿՆՔԵԼՈՒ ՄԱՍԻՆ
Հիմք ընդունելով Հայաստանի Հանրապետության քաղաքացիական օրենսգրքի 685-րդ հոդվածը, «Ավելացված արժեքի հարկի մասին» Հայաստանի Հանրապետության օրենքի 7-րդ հոդվածի 1-ին մասի 2-րդ կետը և ի կատարումն Հայաստանի Հանրապետության կառավարության 2014 թվականի հունվարի 9-ի N 13-Ն որոշման 6-րդ կետի՝ Հայաստանի Հանրապետության կառավարությունը ո ր ո շ ու մ է.
1. Սահմանել, որ պետական սեփականություն հանդիսացող՝ Գյումրի քաղաքի Գայի 1 հասցեում գտնվող՝ 6291.6 քառ. մետր մակերեսով շենք շինությունների (գլխավոր մասնաշենք` 5899.9 քառ. մետր, օժանդակ շինություն` 358.2 քառ. մետր, ենթակայան`
23.4 քառ. մետր, պարիսպ` 10.1 քառ. մետր, 56.6 խոր. մետր) և 0.43602 հեկտար հողամասի (այսուհետ՝ անշարժ գույք) տարածքում «Բաղրամյանշին» բաց բաժնետիրական ընկերության և «Ախուրյանի կոոպշին» սահմանափակ պատասխանատվությամբ ընկերության համատեղ (joint venture) կատարված վերանորոգման աշխատանքների` 1,603,207,258 դրամ
80 լումա հաշվեկշռային արժեքով արդյունքը, որը «Ձեռնարկությունների ինկուբատոր» հիմնադրամի կողմից ընդունվել է 2014 թվականի փետրվարի 28-ի Շինարարության ավարտական ակտի և Ավարտված շինարարական օբյեկտը շահագործման ընդունող հանձնաժողովի ակտի համաձայն, «Ձեռնարկությունների ինկուբատոր» հիմնադրամի կողմից Հայաստանի Հանրապետության կառավարությանն առընթեր պետական գույքի կառավարման վարչությանը հանձնվում է անհատույց գործարքի միջոցով:
2. Առաջարկել «Ձեռնարկությունների ինկուբատոր» հիմնադրամին սույն որոշումն ուժի մեջ մտնելուց հետո սույն որոշման 1-ին կետում նշված վերանորոգման աշխատանքների արդյունքն անհատույց գործարքի միջոցով մեկամսյա ժամկետում հանձնել Հայաստանի Հանրապետության կառավարությանն առընթեր պետական գույքի կառավարման վարչությանը։
3. Սույն որոշման 1-ին կետում նշված անշարժ գույքն անհատույց օգտագործման իրավունքով 20 տարի ժամկետով հանձնել «Ձեռնարկությունների ինկուբատոր» հիմնադրամին և թույլատրել վերջինիս անշարժ գույքից երրորդ անձանց անհատույց օգտագործման կամ վարձակալության հանձնել տարածքներ անհատույց օգտագործման ամբողջ ժամանակահատվածում:
4. Հայաստանի Հանրապետության կառավարությանն առընթեր պետական գույքի կառավարման վարչության պետին՝
1) ապահովել սույն որոշման 1-ին կետում նշված անհատույց գործարքի միջոցով արդյունքների ընդունումը` Հայաստանի Հանրապետության էկոնոմիկայի նախարարության և «Ձեռնարկությունների ինկուբատոր» հիմնադրամի հետ կնքելով եռակողմ պայմանագիր.
2) սույն որոշման 4-րդ կետի 1-ին ենթակետում նշված աշխատանքների ավարտից հետո վերանորոգման աշխատանքների արժեքն արտացոլել հաշվապահական հաշվեկշռում.
3) սույն որոշումն ուժի մեջ մտնելուց հետո երկամսյա ժամկետում «Ձեռնարկությունների ինկուբատոր» հիմնադրամի հետ կնքել սույն որոշման 3-րդ կետում նշված անշարժ գույքի անհատույց օգտագործման մասին պայմանագիր՝ դրանում նախատեսելով, որ տարածքի սեփականատերը համաձայն է, որպեսզի «Ձեռնարկությունների ինկուբատոր» հիմնադրամը, ըստ անհրաժեշտության, տարածքում կատարի փակ և բաց լարանցումներ, անցկացնի հաղորդակցության ուղիներ, իրականացնի վերանախագծումներ և վերասարքավորումներ, միջնապատերի վերակառուցման աշխատանքներ (այսուհետ՝ անբաժանելի բարելավումներ), ընդ որում՝ այդ դեպքում «Ձեռնարկությունների ինկուբատոր» հիմնադրամն իրավունք չունի հատուցում պահանջելու տարածքի սեփականատիրոջից անբաժանելի բարելավումների արժեքի չափով։
5. Սույն որոշումն ուժի մեջ է մտնում Հայաստանի Հանրապետության կառավարության 2015 թվականի օգոստոսի 13-ի N 924-Ն որոշումն ուժի մեջ մտնելուն հաջորդող օրվանից, և դրա գործողությունը տարածվում է 2015 թվականի ապրիլի 3-ից հետո ծագած հարաբերությունների վրա:
