8 Օգոստոսի 2013, 848 - Ն
ԵՎՐԱՊԱՐՏԱՏՈՄՍԵՐ ԹՈՂԱՐԿԵԼՈՒ ՆՊԱՏԱԿՈՎ ԳԼԽԱՎՈՐ ՏԵՂԱԲԱՇԽՈՂՆԵՐԻ ՀԵՏ ՊԱՅՄԱՆԱԳԻՐ ԿՆՔԵԼՈՒ ՄԱՍԻՆ
Համաձայն Հայաստանի Հանրապետության կառավարության 2011 թվականի փետրվարի 10-ի N 168-Ն որոշման 1-ին կետով հաստատված կարգի 32-րդ կետի 5-րդ ենթակետի «բ» պարբերության՝ Հայաստանի Հանրապետության կառավարությունը ո ր ո շ ո ւ մ է.
1. Եվրապարտատոմսեր թողարկելու նպատակով <<Deutsche Bank AG, London Branch>>, <<HSBC Bank plc>>, <<J.P.Morgan Securities plc>> ընկերությունների հետ կնքել գլխավոր տեղաբաշխողի ծառայության ձեռքբերման պայմանագիր:
2. Սահմանել, որ սույն որոշման 1-ին կետում նշված ծառայության գնումն իրականացվելու է «Գնումների մասին» Հայաստանի Հանրապետության օրենքի 20-րդ հոդվածի 5-րդ մասի 2-րդ կետով նախատեսված ընթացակարգով:
3. Հայաստանի Հանրապետության ֆինանսների նախարարին`
1) Հայաստանի Հանրապետության կառավարության անունից ստորագրել նշված ծառայությունների պայմանագիրն ընտրված գլխավոր տեղաբաշխողների հետ.
2) սույն որոշման 1-ին կետում նշված ծառայության գնման պայմանագիրը կնքելուց հետո պայմանագրով նախատեսված ժամկետներում վճարում իրականացնելու նպատակով Հայաստանի Հանրապետության կառավարության քննարկմանը ներկայացնել ֆինանսական միջոցներ նախատեսելու վերաբերյալ Հայաստանի Հանրապետության կառավարության որոշման նախագիծ.
3) եվրապարտատոմսերի թողարկման նպատակով միջազգային իրավախորհրդատուի և գլխավոր տեղաբաշխողների հետ կազմված միջոցառումների իրականացման ժամանակացույցին համապատասխան Հայաստանի Հանրապետության կառավարության քննարկմանը ներկայացնել Հայաստանի Հանրապետության պետական արտարժութային պարտատոմսերի թողարկման ազդագիրը (Prospectus):
4. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
