7 Օգոստոսի 2008, 871 - Ն
ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ՍՏԵՓԱՆԱԿԵՐՏ ՔԱՂԱՔՈՒՄ «ՀԱՅԱՍՏԱՆԻ ՊԵՏԱԿԱՆ ԱԳՐԱՐԱՅԻՆ ՀԱՄԱԼՍԱՐԱՆ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅԱՆ ՄԱՍՆԱՃՅՈՒՂ ՍՏԵՂԾԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2005 ԹՎԱԿԱՆԻ ՍԵՊՏԵՄԲԵՐԻ 15-Ի N 1567-Ն ՈՐՈՇՄԱՆ ՄԵՋ ԼՐԱՑՈՒՄ ԿԱՏԱՐԵԼՈՒ ՄԱՍԻՆ
Համաձայն «Պետական ոչ առևտրային կազմակերպությունների մասին» Հայաստանի Հանրապետության օրենքի 8-րդ հոդվածի 1-ին մասի, «Իրավական ակտերի մասին» Հայաստանի Հանրապետության օրենքի 70-րդ հոդվածի 5-րդ մասի և հաշվի առնելով Լեռնային Ղարաբաղի Հանրապետության կառավարության Արցախի պետական համալսարանի գյուղատնտեսության ֆակուլտետի և Ստեփանակերտի գյուղատնտեսական քոլեջի ընդգրկմամբ Ստեփանակերտ քաղաքում «Հայաստանի պետական ագրարային համալսարան» պետական ոչ առևտրային կազմակերպության մասնաճյուղ բացելու վերաբերյալ առաջարկությունը` Հայաստանի Հանրապետության կառավարությունը ո ր ո շ ու մ է.
1. Լեռնային Ղարաբաղի Հանրապետության Ստեփանակերտ քաղաքում ստեղծել «Հայաստանի պետական ագրարային համալսարան» պետական ոչ առևտրային կազմակերպության մասնաճյուղ (այսուհետ` մասնաճյուղ), որը գործելու է Լեռնային Ղարաբաղի Հանրապետության օրենքներին համապատասխան:
2. Ընդունել ի գիտություն, որ մասնաճյուղին անհատույց օգտագործման իրավունքով հանձնվելու են Լեռնային Ղարաբաղի Հանրապետության Ստեփանակերտ քաղաքի գյուղատնտեսական քոլեջի 1766.11 քառ. մետր ընդհանուր մակերեսով ու 9250.0 հազ. դրամ արժողությամբ ուսումնական և 493.96 քառ. մետր ու 2301.0 հազ. դրամ արժողությամբ հանրակացարանային մասնաշենքերը և 52221.001 հազ. դրամ արժողությամբ հիմնական ու շրջանառու միջոցները:
3. Հայաստանի Հանրապետության կառավարության 2005 թվականի սեպտեմբերի 15-ի «Հայկական գյուղատնտեսական ակադեմիա» պետական ոչ առևտրային կազմակերպությունը վերանվանելու, «Հայաստանի պետական ագրարային համալսարան» պետական ոչ առևտրային կազմակերպության կանոնադրությունը հաստատելու, Հայաստանի Հանրապետության կառավարության 2002 թվականի ապրիլի 27-ի N 471 որոշման մեջ փոփոխություններ կատարելու և մայիսի 31-ի N 643 որոշումն ուժը կորցրած ճանաչելու մասին» N 1567-Ն որոշմամբ հաստատված կանոնադրության 33-րդ կետը «որոշմամբ» բառից հետո լրացնել «և Լեռնային Ղարաբաղի Հանրապետության Ստեփանակերտի մասնաճյուղը,» բառերով:
4. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
